Íþróttafélagið Leiftur stendur fyrir spilavist öll þriðjudagskvöld í UÍÓ húsinu (húsið við knattspyrnuvöllin). Byrjað er að spila kl. 20:00 og eru allir velkomnir. Það kostar kr. 600 að vera með og er veitt verðlaun fyrir besta og versta skor kvöldsins í báðum kynjaflokkum.

Myndin var tekin í gær og var spilað á 7 borðum. Vanalega er spilað á 6-7 borðum.

Nú er ný skoðanakönnun komin í loftið. Það væri gaman að fá að vita hvernig þið fréttuð af þessari síðu, endilega að taka þátt. Einnig ef þið hafið ábendingar um það hvernig við getum látið vita af síðunni. Við fengum ábendingu um að setja síðuna á facebook og umferðin tvöfaldaðist. En Facebook vinir 625 eru orðnir á fjórða hundraðið.

Við sögðum frá því hér í gær að fundur hafi verið haldinn um jólahús og aðventuna, hér er bréfið sem verður sent í öll hús í kvöld.
---
Jólamarkaðurinn:

Jólamarkaðurinn verður laugardaginn  28. nóvember frá kl. 14:00-18:00 (ath. hann verður ekki 26. nóvember eins og áður var auglýst). Skráning á markaðinn stendur yfir hjá fræðslu- og menningarfulltrúa (Karítas) í síma 464-9200 eða á karitas@fjallabyggd.is

Kveikt verður á jólatrénu þennan dag og hefst dagskrá kl. 16:00.

Ný jólahús við Tjarnarborg verða formlega tekin í notkun. Boðið verður uppá kakó og piparkökur.

Jólahúsin:
Síðastliðinn mánudag  var haldinn fundur með hinum ýmsum félögum og samtökum þar sem jólahúsin voru kynnt. Búið er að kaupa efni í húsin, en treyst verður á sjálfboðavinnu við að koma þeim saman. Byrjað verður að smíða jólahúsin fimmtudaginn 5. nóvember kl. 20:00 í áhaldahúsinu. Nú er treyst á samstöðu bæjarbúa og eru allir hvattir til að mæta með hamarinn!

Aðventudagskráin:
Fjallabyggð mun safna saman viðburðum sem verða á aðventunni líkt og undanfarin ár. Þeir sem vilja koma viðburðum inn í þessa sameiginlegu dagskrá, sem gefin verður út í Tunnunni, þurfa að hafa samband við fræðslu- og menningarfulltrúa (Karítas) í síma 464-9200 eða á karitas@fjallabyggd.is

Ólafsfirðingar eru orðnir þekktir fyrir vel skreyttan bæ. Látum ekki deigan síga í ár og skreytum fyrir 28. nóvember!

Karítas Skarphéðinsdóttir Neff

Fræðslu-og menningarfulltrúi

Þegar vitað var að þessi framkvæmd yrði á dagskrá varið ákveðið að teikna upp framtíðarskipulag á svæðinu. Þar má nefna nýja heita potta, rennibraut, lendingarlaug og nýbyggingu undir líkamsrækt. Þær framkvæmdir sem er verið að gera í þessari lotu og hefur verið samið við GJ smiði um er bygging tæknirýmis, frágangur girðingar, steypa upp potta og lendingarlaug. Tæknirýmið verður hannað þannig að það er hugsað sem undirstaða fyrir rennibrautina, þannig að í næsta áfanga þarf bara að koma rennibrautinni fyrir þar sem búið verður að gera grunninn fyrir hana. Áætlað er að þetta svæði verði tekið aftur í notkun fyrir sumarið.  

Hérna má sjá grunnmynd af svæðinu eins og það mun koma til með að líta út í framtíðinni


Pottasvæðið, efst uppi til hægri á myndinni má sjá hringstiga, en þar verður rennibrautin og endar í kerinu sem er niðri í vinstra horninu á myndinni.


Frá undirskriftinni. Mynd: Gísli Kristins

Fréttatilkynnning frá Íslenska Gámafélaginu:
---
Dagana 5.-8. nóvember næstkomandi munu ráðgjafar frá Íslenska Gámafélaginu heimsækja alla íbúa í Fjallabyggð og veita faglega ráðgjöf og svara þeim spurningum sem kunna að koma upp varðandi breytingar á sorphirðu.

Áður verður búið að dreifa handbók um nýtt fyrirkomulag sorphirðu í Fjallabyggð. Mjög mikilvægt er að varðveita vel sorphirðuhandbókina. Hún veitir almennar upplýsingar um flokkun, hvernig kerfið virkar og aðrar gagnlegar upplýsingar. Til að fræðslan verði sem skilvirkust bendum við íbúum á að kynna sér bæklinginn áður en ráðgjafar Íslenska Gámafélagsins koma í heimsókn.

Einnig verður hægt að fá ráðgjöf í síma 577 5757 eða með því að senda tölvupóst á netfangið igf@igf.is.

Við hlökkum til að sjá þig,

Starfsfólk Íslenska Gámafélagsins

Aðalfundi Skíðafélags Ólafsfjarðar sem vera átti 4. nóvember, hefur verið frestað til 18. nóvember.