Jafntefli í 1. leik Hleðslumótsins

Lið Þórs2 og KF sættust á skiptan hlut í síðasta leik fyrstu umferðar Hleðslumótsins sem fram fór í Boganum í gær.
KF var töluvert sterkari allan leikin en náði því miður ekki að nýta sér það nægjanlega vel.  Arnór Egill Hallsson sem var á prufu hjá KF fékk gott færi strax í upphafi leiks eftir góðan samleik. Markmaður Þórs náði að verja vel frá honum og staðan því áfram 0-0, en um miðjan fyrri hálfleik náðu leikmenn KF forustu. Á 30. mínútu fékk KF dæmda aukaspyrnu rétt fyrir utan vítateig Þórsara. Þórður Birgisson tók spyrnuna og skoraði með laglegu skoti í nærhornið.
Átta mínútum síðar tókst Þórði að spóla sig í gegnum vörn Þórs2 en Ari Már Egilsson markvörður Þórsara varði boltann í stöng. Staðan var því 1-0 í hálfleik, Fjallabyggðarstrákum í vil.

Síðari hálfleikur var nokkuð svipaður þeim fyrri að því leytinu til að KF var nokkru sterkari aðilinn og tókst að skapa sér nokkur marktækifæri meðan sóknarleikur Þórs2 var heldur bragðdaufur. Á 57. mínútu fá Þórsarar dæmda vítaspyrnu eftir að varnarmaður KF hafði togað sóknarmann Þórs2 niður í vítateignum. Menn voru misjafnlega sáttir við þá ákvörðun en ekki skal deila við dómarann. Ingólfur Árnason steig á punktinn og jafnaði leikinn með góðri spyrnu. Hættulegasta færi KF-inga í síðari hálfleik fékk Þórður á 74. mínútu þegar hann slapp einn í gegnum varnarlínu Þórsara en Ari sá við honum í markinu. Í uppbótartíma leiksins fékk Þórður svo að líta beint rautt spjald fyrir kjaftbrúk.

Leikmenn liðanna sættust á skiptan hlut og sitja því í 2. og 3. sæti B-riðils eftir fyrstu umferðina.

aðsendur texti