Eins og flestir bæjarbúar sjálfsagt vita þá er búið að ákveða að byggja við Grunnskólann við Tjarnarstíg (gamli Barnaskólinn). Við kíktum við í dag og tókum nokkrar myndir. Við munum að sjálfsögðu mynd reglulega á framkvæmdartímanum og birta hér á síðunni.
Myndir í myndaalbúminu.

Kennarar Menntaskólans á Tröllaskaga láta ekki ófærð á sig fá og nýta tæknina til kennslu. 
Á heimasíðu MTR er sagt frá því að  Óliver Hilmarsson, kennari hafi verið tepptur heima hjá sér í Skíðadal og í stað þess fella niður kennslu þá kenndi hann í gegnum Skype.


Myndin var tekin síðdegis, í tíma í áfanganum "Inngangur að náttúruvísindum". Óliver situr heima hjá sér í Skíðadal og útskýrir landrekskenninguna í myndum og máli fyrir nemendum í skólastofunni í Ólafsfirði. Myndin er af vef MTR

Í tilefni af degi íslenskrar tungu heldu nemendur Grunnskólans upp á daginn með skemmtilegri dagskrá í hádeginu í dag. Foreldrum var boðið að koma og fylgjast með. Nemendur 1.-6. bekkjar í lásu upp og fóru með ýmis ljóð og texta.
Fyrr um morguninn hafði 6. bekkur farið í heimsókn á leikskólann og lesið fyrir krakkan þar.
7. bekkur fór yfir til Siglufjarðar þar sem hann sameinaðist með 7. bekk á Siglufirði í dagskrá þar sem farið var á Síldarminjasafnið og bókasafn Fjallabyggðar á Siglufirði.
Myndir komnar í myndaalbúmið.

Fyrirlestur um sorg og sorgarviðbrögð verður haldinn í Siglufjarðarkirkju mánudagskvöldið 21. nóvember kl. 20:00

Fyrirlesari er sr. Halldór Reynisson,  verkefnisstjóri fræðslumála á Biskupsstofu.

Öll mætum við sorg og harmi í lífi okkar. Í fyrirlestrinum verður fjallað um ferli sorgarinnar,  gerð grein fyrir þeim tilfinningum sem upp geta komið og úrvinnslu þeirra.

 Fyrirlesturinn er öllum opinn og aðgangur ókeypis.

Sóknarnefndir og sóknarprestar í Hríseyjar-, Dalvíkur-, Ólafsfjarðar- og Siglufjarðarprestaköllum

Bæjarbúar hafa rætt bæjarmálin mikið í dag og velt því fyrir sér stöðunni, en Í morgun birtist grein frá Sólrúnu Júlíusdóttur á siglo.is þar kemur fram að hún hafi sagt sig úr  Framsóknarfélagi Fjallabyggðar, ástæðan er ágreiningur vegna fyrirhugaðra framkvæmda við Grunnskóla Fjallabyggðar.

Á bæjarstjórnarfundi í dag var eftirfarandi bókun lögð fram af meirihluta bæjarfulltrúa:

"Vegna yfirlýsingar Sólrúnar Júlísdóttur í dag um að hún styðji ekki uppbyggingu Grunnskóla Fjallabyggðar leggjum við bæjarfulltrúar í Fjallabyggð fram eftirfarandi bókun.

Á síðasta kjörtímabili hóf bæjarstjórn Fjallabyggðar vinnu við að móta framtíðarskipan skólamála í sveitarfélaginu eftir opnun Héðinsfjarðarganga. Um fá mál hefur verið fjallað jafn ítarlega hjá bænum síðustu árin og að þeirri vinnu hafa komið fulltrúar bæjarstjórnar, hagsmunaaðilar og utanaðkomandi ráðgjafar.

Frá upphafi hefur legið fyrir að nauðsynlegt yrði að fara í nýframkvæmdir og/eða verulegar endurbætur á skólahúsnæði, jafnt í Ólafsfirði sem á Siglufirði. Mikil sátt hefur verið um alla þessa vinnu í bæjarstjórn þar til fyrir örfáum vikum. Markmið bæjarstjórnenda er að reka áfram fyrsta flokks grunnskóla í Fjallabyggð með jöfnu skólahaldi í báðum byggðarkjörnum þannig að ferðatíðni nemenda úr báðum byggðarkjörnum verði sem jöfnust.

Fyrirhugaðar framkvæmdir.

Kostnaður við nýbyggingu og búnaðarkaup á Ólafsfirði er um 200 milljónir kr. og skólahúsnæðið á að vera tilbúið til afnota 1. september 2012. Kostnaður við nýbyggingu og búnað á Siglufirði er einnig áætlaður um 200 milljónir kr. og stefnt er að útboði á þeim áfanga árið 2012 og að skólahúsnæðið verði tilbúið til notkunar fyrir skólaárið 2013/2014. Verði ekki farið í nýbyggingu á Siglufirði þarf að fara í verulegar endurbætur á húsnæði grunnskólans við Hlíðarveg sem kosta álíka mikið og fyrirhuguð viðbygging. Eftir stæði að grunnskólinn yrði rekinn í tveimur húsum á Siglufirði með tilheyrandi kostnaði og óhagræði í skólastarfi. Óbreytt ástand í húsnæðismálum á Siglufirði er ekki valkostur. Það hefur legið fyrir allan tímann.

Framkvæmdir við Menntaskólann á Tröllaskaga kosta 15 milljónir kr.

 

Sparnaður og fjármögnun

Handbært fé Fjallabyggðar um síðustu áramót var 270 milljónir kr. Áætlaður byggingarkostnaður við umræddar framkvæmdir við Grunnskóla Fjallabyggðar er um 415 milljónir kr. og eru þá breytingar á núverandi húsnæði menntaskólans inn í þeirri tölu. Reiknað er með því að sá kostnaður skili sér með rekstrarsparnaði á 10 árum. Áætlaður sparnaður í rekstri við að fækka skólahúsnæði um eina byggingu er talinn vera um 12 m.kr. á ári eða um 120 m.kr. á 10 árum. Áætlaður sparnaður í launum kennara og skólastjórnunar er talinn vera um 25 m.kr. á ári eða um 250 m.kr. á 10 árum. Sparnaður við húsvörslu og ræstingu er um 5 m.kr. á ári eða um 50 milljónir kr. á 10 árum. Heildarsparnaður er því um eða yfir 420 m.kr. á 10 árum. Þá er gert ráð fyrir ítrustu mönnun grunnskólans.

 Undirritaðir leggja áherslu á að fullur stuðningur er við störf núverandi bæjarstjóra og hefur hann áfram óskorað umboð meirihluta bæjarfulltrúa Fjallabyggðar til sinna starfa.

Bjarkey Gunnarsdóttir, Helga Helgadóttir, Ingvar Erlingsson,

Magnús A. Sveinsson, Ólafur H. Marteinsson, Þorbjörn Sigurðsson

Frá Tónskóla Fjallabyggðar.

Innritun í Tónskóla Fjallabyggðar fer fram dagana 22 - 26 ágúst frá kl 09.00 - 15.00. Nemendur í Tónskóla Fjallabyggðar 2010 - 2011 þurfa að staðfesta áframhaldandi nám fyrir skólaárið 2011 - 2012. Hægt er að hafa samband í síma 464-9210, 4649132 eða 898-2516 og í tölvupósti tonskoli@fjallabyggd.is Nýjum nemendum sem sækja vilja nám við skólann vetur, er bent á heimasíðu skólans http://tonskoli.fjallabyggd.is  og sækja þar um  rafrænt, fara í valmynd og innritun og fylla þar út umsókn, fyrir veturinn 2011 - 2012.

Starfsmann vantar í lengda viðveru skólabarna á aldrinum 6-8 ára. Nánar á heimasíðu Fjallabyggðar.

Grunnskóla Fjallabyggðar var formlega slitið í fyrsta skiptið í dag. Miklar breytingar hafa orðið á skólamálum hér í Fjallabyggð undanfarið ár og mun bara breytast meira á næstu árum.
Myndir komnar í myndaalbúmið frá skólasliti 1.-6. bekkjar í Ólafsfirði.

1. og 2. bekkur

Laugardaginn 14. maí kl. 14:00 - 16:00 verður sýning á verkum nemenda Menntaskólans á Tröllaskaga.

Nemendur verða með ferðakynningu þar sem þau kynna ferðahugmyndir á Tröllaskaga og hægt verður að ræða við þau um viðfangsefnið. Einnig verður sýning nemenda í fagurlistum og listljósmyndum á portrettmyndum og verk sem hafa verið unnin í úrgangslist.

Við kíktum við í dag þegar nemendur í efri deild Grunnskóla Fjallabyggðar voru að undirbúa árshátíðina sína sem fram fór í kvöld í Tjarnarborg. Kvöldið endar svo með diskói hjá nemendum. Myndir komnar í myndaalbúmið.

undirbúningur í fullum gangi

Leikskólarnir Leikhólar og Leikskálar verða með opið hús mánudaginn 7.  febrúar í tilefni af degi leikskólans sem ber nú upp á sunnudegi  6. febrúar.  Leikskólarnir eru opnir frá kl 8:00 til kl 16:00.

Bæjarbúar eru hvattir til að koma í heimsókn og fylgjast með því frábæra starfi sem fram fer í leikskólanum.  Foreldrar, ömmur, afar, systkini og aðrir bæjarbúar eru velkomir að skoða starf skólans, hitta kennara og börn í skemmtilegu spjalli.

Dag leikskólans, 6. febrúar ber að þessu sinni upp á sunnudag.  6. febrúar er merkilegur dagur í íslenskri leikskólasögu því þann dag árið 1950 stofnuðu frumkvöðlar leikskólakennara fyrstu samtök sín og var því fagnað í fyrra á 60 ára afmæli félagsins.

Dagur leikskólans verður nú haldinn í fjórða sinn, leikskólakennarar og annað starfsfólk leikskóla hafa á undanförnum árum, ásamt börnunum, gert daginn eftirminnilegan á margan hátt.
Dagur leikskólans er samstarfsverkefni Félags leikskólakennara, mennta- og menningarmála-ráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfið út á við.

Sem kunnugt er hóf skólinn starfsemi nú í haust og er þar af leiðandi yngsti framhaldsskóli landsins. Skólinn starfar í Ólafsfirði og þrátt fyrir að hafa aðeins verið starfræktur í skamman tíma útskrifaði hann nú fyrir jólin fyrsta stúdentinn.

Sparisjóðirnir tveir tóku höndum saman um listaverkagjöfina til skólans sem er að andvirði 500 þúsund króna. Ákveðið var að leita til listamanna í Fjallabyggð og fyrir valinu urðu tvö málverk eftir listamennina Bergþór Morthens og Guðrúnu Þórisdóttur (Garún). Þess má geta að Bergþór Morthens er bæjarlistamaður Fjallabyggðar 2010.

Meðfylgjandi mynd er frá afhendingu listaverkanna tveggja en þau afhenti Helgi Jóhannsson, sparisjóðsstjóri Sparisjóðs Ólafsfjarðar. Lára Stefánsdóttir, skólameistari Menntaskólans á Tröllaskaga, veitti verkunum viðtöku fyrir hönd skólans og heldur hún hér á verki Guðrúnar Þórisdóttur en Helgi stendur við mynd Bergþórs Morthens.

(Fréttin og myndin er af heimasíðu Sparisjóðs Ólafsfjarðar)

Eftirfarandi tilkynning barst 625.is:
---
Ágætu íbúar Fjallabyggðar. Nemendur 10. bekkjar Grunnskóla Fjallabyggðar munu dreifa blaðinu "Snarl"  í hús  núna fyrir jólin. Þetta er blað sem bekkurinn er að gefa út í tengslum við fjáröflun fyrir útskriftarferð í vor. Ákveðið hefur verið að dreifa blaðinu frítt í öll hús þessi jól þar sem við erum að kynna það hér á Siglufirði en þetta hefur verið hefð í 10. bekk í Ólafsfirði til nokkurra ára. Við viljum endilega halda þeirri hefð við í nýjum sameinuðum skóla okkar í Fjallabyggð. Vonandi munið þið hafa ánægju af blaðinu okkar en það inniheldur ýmislegt tengt jólum, fréttir af okkar fólki í skólanum, viðtöl við ýmsa bæjarbúa og margt fl., ásamt því að innihalda auglýsingar og jólakveðjur frá ýmsum fyrirtækjum hér í byggðarlaginu og utan þess.

Með óskum um gleðileg jól og þökkum fyrir veittan stuðning

Fh. 10. bekkjar.

Bjarkey Gunnarsdóttir og Erla Gunnlaugsdóttir.